Almutida Xelqara Qelemkeshler Jemiyiti Uyghur Merkizining saylimi bolup ötti

Xelqara Qelemkeshler Jemiyiti Uyghur Merkizining saylimi 2025-yili 16-aprél küni Almuta shehiridiki Mir neshriyati ishxanisida bolup ötti. Ushbu jemiyetning xizmetliridin hésab bérish we saylam ötküzüsh yighingha jemiyetning Qazaqistandiki ezaliri kélip qatnashqandin sirt, dunyaning herqaysi ellerdiki ezaliri intérnét tori arqiliq qatnashti. Yighingha jemi 24 neper kishi ishtirak qildi.

Bu yighin Xelqara Qelemkeshler Jemiyiti Uyghur merkizi (PEN klub) ijra’iye komitétining re’isi Alishér Xalilow riyasetchilik qildi. Uyghur penning ötkenki qerellik sabiq re’isi ressam Qeyser Özhun söz qilip, uyghur pen kulubning qurulush tarixi we ushbu qerellik wezipide élip barghan xizmetliri heqqide doklat berdi.

Kéynki nöwet sözge chiqqan Xelqara Qelemkeshler Jemiyiti Uyghur Merkizi bash katipi, yazghuchi Xemit Hemrayéw özi bu wezipide bolghan mezgilde élip barghan xizmetler heqqide toxtaldi.

Uyghur pen ezasi ataqliq sha’ir Abdughopur Qutluqow söz qilip, Qeyser Özhunni yene nöwetlik prézidéntliq wezipisige saylash toghriliq teklip berdi. Bu teklipke u jawap bérip, özining üchinchi qétim namzat bolush hoquqigha ige emeslikini bildürdi.

Uyghur pen kulubning aldinqi nöwetlik sabiq bash katipi, Büyük Birtaniyede yashaydighan sha’ir, akadémik Aziz Isa Elkun mezkur jemiyetning idare heyetliri teripidin prézidéntliq namzatliqigha körsitilgen idi.

Özbékistan we Qazaqistangha xizmet bilen kélip, Almatada ötküzülgen bu yighingha qatnashqan Aziz Isa Elkun söz qilip, Uyghur pen kulubning bu nöwetlik prézidént namzatliq teklipini qobul qilidighanliqini bildürdup, Uyghur pen kulubi idare heyitining özini prézidéntliq namzatliqigha körsetkenlikige rehmet éytip, eger mezkur jemiyetning barliq ezaliri özini saylamda prézidéntliqqa saylisa, jemiyetning kélechek tereqqiyati üchün tirishchanliq körsitidighanliqi we uyghur edebiyatni dunyagha tonutush, Uyghur xelqining yézish we pikir erkinlikini himaye qilish üchün jan pidaliq bilen xizmet qilidighanliqini éytti.

Ushbu yighin bir sa’et dawam qilghandin kéyin, Xelqara Qelemkeshler Jemiyiti Uyghur merkizining resmi saylimi bolup ötti. Saylamda barliq jemiyet ezalirining awaz bérishi arqiliq, toluq awaz bilen Aziz Isa Elkun jemiyetning prézidéntliq wezipisige saylandi.

Kéyin jemiyetning idare heyet saylimi ötküzülüp, barliq ezalarning awaz bérishi bilen Alishér Xalilow merkizining bash katipliq wezipisige saylandi. Ijra’iye komitét heyiti re’islik wezipisige senetshunasliq doktori, ressam Hakimjan Guli’éw saylandi.

Jemiyet ijra’iye komitétining heyet ezaliqigha töwendiki kishiler saylandi:

Merkez prézidénti Aziz Isa Elkun, bash katip Alishér Xalilow, Hakimjan Guli’éw, Xamit Hemra’éw, Vilyam Molotov, Ihsan we Meryem sultan.

Axirida sha’ir Abdughopur Qutluqowning teklipi awazgha qoyulup, bu heqte jiddiy munazire élip bérilghandin kéyin, köp sanliqni igilligen ezalarning awaz bilen Qeyser Özhungha «pexriy prézidént» atighi bérildi.

Yighin axirida Xelqara Qelemkeshler Jemiyiti Uyghur Merkizining bu nöwetlik saylimida prézidént bolup saylanghan Aziz Isa Elkun xulase sözi qilip, nöwette mezkur merkezning élip baridighan xizmetlirining nahayiti jiddiy ikenlikini, bolupmu Uyghurlarning bügünki siyasiy we ijtima’iy weziyiti, hem ‍edebiyati we senitini dunyagha tonutush, Uyghur yazghuchi we senekarlirining hoquqini qoghdash nöwette ishlinidighan eng muhim wezipilerning biri ikenlikini tekitlep, mundin kéyin mezkur jemiyettiki barliq ezalarning qollishi we yardimi bilen, Uyghur millitining milliy menpe’etini chiqish qilip, ishte dostluq we barawerlik asasida nishanlanghan wezipilerni emelge ashuridighanliqini, barliq jemiyet ezaliri we bash shitabi Londongha jaylashqan Xelqara Qelemkeshler Jemiyitining yardimi bilen hemkarliship ishleydighanliqini bildürüp, jemiyet ezalirining özige bu muhim we shereplik wezipini tapshurghanliqigha minnetdarliqini bildürdi.

Xelqara Qelemkeshler Jemiyiti Uyghur Merkizining bu nöwetlik saylanghan rehberlirining Uyghur xelqimizning bügün we kélechek bext- sa’aditi yolida xizmet qilish üchün basqan her bir qedemlirining xeyrlik we utuqluq bolishini tileymiz.