Uyghur PEN Board Members
Post Tagged with: "Talet Baki Mollahaji Oghli"
-
Almutida «Menggülük Sada» Romani Tonushturuldi
Éqimdiki yilning yettinchi éyining 11-küni kech sa’et 16 de Almuta shehiridiki “Korgan” kafiside Uyghur yazghuchisi Talet Baki Mollahaji Oghlining «Menggülük Sada» namliq romanigha bëghishlanghan kitap tonushturush murasimi bolup ötti. Bu murasimni ötküzüsh teshebbusini Xelqaraliq Uyghur Qelemkeshler merkezining (Uyghur PEN) Qazaqstandiki shöbisi kötürgen bolup, uyushturghuchilar süpitide Uyghur PEN-merkezi we Almutidiki «Ghulja yoli» meshrep ehli heriket qildi. Muellip bu kitapa hörluk we erkinlik üchün küreshte qurban bolghan dost-yaren, we qërindashlirining exatirsige bëghishlighan bolup, uningda ötken esirning 50 we 60- yillirida ana wetinimizda yürgüzülgen «Istil’ tüzitish», «Polat-choyun tawlash», «Sekrep cong ilgirilesh» qatarliq namlar bilen élip bérilghan shepqetsiz siyasi herketler teswirlengen. Kommunistlar mustemlikichilerining sansizlighan teqip, qirghinchiliqliri hem qatilliqlirigha uchrighan xelqimizning beshigha chüshken külpetliri, azap-oqubetliri we shu dewirning keskin siyasiy -ijtimaiy mesililiri roman qehrimani Abletning teghdiri arqiliq ipadilinidu. Mezkür chare-tedbirning modëratori yash shair Abduljan Aznabaqiev boldi. Yighinda söz alghan xalqara uyghur PEN-merkizining bash katiwi, «MIR» neshriyat öyining mudiri Alisher Helilov kitapning neshir qilinish jeryanlirini paaliyet ishtirakchillirigha tonushturdi. Uyghur PEN-merkizining idare heyiti ezasi we «Ghulja yoli» meshrepining rehbiri Wil’yam Molotow söz nowitini elip, eserning muellipi toghrisidiki biografik melumatlar we romanning Qazaqstanda neshr qilinishi heqqide doklad berdi. Kitapning muherriri Rexmetzhan Ghojemberdiev eserning bügünki tangdiki ehmiyitini alahide atap ötti. Mezkür ish-charige Jemshit Rozaxunov, Awut Mesimov, Hakimjan Guliev, Aznat Talipov, Yoldash Molotow, Rexmetjan Yüsüpov qatarliq ziyalilar ishtiraq qilip, alliy ëhtiramlirini bildürdi. Uyghur PEN merkizining idaret hey’et bashliqi, ataghliq ressam doktor Hakimjan Guliev we ataqliq yazghuchi Hemit Hemraev muellipni qizghin tebriklep, uninggha xatire süpitide Uyghur milliy toni we doppisini hediye qildi. Muellip öz nowitide murasimni uyushturghuchilargha hem kitapni neshir qilishta emgek qilghan barliq kishilerge yürek sölirini éytip, öz razilighini izhar qildi. Bu murasim axirida hemme mëhmanlar birlikte aq destixan etrapida olturshup, erkin muhakime we qizghin söhbetlirini dawamlashturdi.